الست نعمه

كنت فى البنك انهرده بسحب فلوس فا لاقيت واحده ست كبيره معاها كيس ماسكاه ومتبته فيه قوى لو تطول تشيليه فى عينيها هاتشيله ..
المهم انا كنت قاعد ولاقيها رايحه جايه مش عارفه تعمل ايه فا جات وقعدت جنبى ..
قالتلى هو انا المفروض اعمل ايه 
قولتلها انتى عاوزه تعملى ايه 
قالتلى انا عاوزه احط مبلغ فى حساب حد ..
قولتلها صورى بطاقتك عشان هايطلبوها منك ولازم يكون معاكى الاصل بتاعها ..
لاقيتها زعلت قوى دانا مش معايا اى حاجه من دول خالص ..
قولتلها ممعكيش بطاقه قالتلى معايا ..
بصيت فيها لاقيتها منتهيه والبنك هايرفضها ..
قولتلها خلاص يا ماما خلى الفلوس معاكى ومنين ماتطلعى بطاقه

جديده حطيهم فى حساب صاحبهم..
قالتلى دى امانه ولازم تترد انهرده وانا مابعرفش اقرا ولا اكتب حتى وهاتعب قوى عشان اطلع البطاقه دى طوابير مالهاش اول من اخر ياولدى..
قولتلها طب يجيلك صاحب الامانه البيت وادهومله ..
قالتلى ده مش هنا فى البلد ده فى مصر ..
وانا خاېفه اسيب الفلوس فى البيت اكتر من كدا لحسن يتسرقوا منى وانا عايشه لوحدى حد ينط ياخدهم وانا مش حاسه وخاېفه ارجع بيهم لحسن حد يزيقنى ويسرقهم ..
حسيت انها فعلا شايله الهم قوى ..
قولتلها طيب معاكى رقم الحساب 
قالتلى اه
قولتلها معاكى رقم تليفون الشخص صاحب الامانه 
قالتلى اه
المهم خدت منها رقم التليفون وكلمت الشخص ده كلمته وحاكتله على كل حاجه وقولتله انا هاحطهملك ببطاقتى ..
ساعتها لاقيته عمل حاجه غريبه جدا قالى لحظه خليك معايا ..
ونادى على واحده غالبا مراته وقالى من فضلك قولها الكلمتين اللى قولتهملى دلوقتى ..
كلمتها وقولتلها راح الراجل خد التليفون وقالى من فضلك ادينى الست نعمه عاوز اكلمها ..
قولتلها انتى اسمك نعمه يا امى قالتلى اه ياولدى قولتلها طيب خدى الراجل عاوز يكلمك ..
كلمته وفجأه لاقيتها بتبكى وقالتله لا ياولدى ماستحقهمش دى فلوسك انا الحمدلله ربنا كارمنى من وسع مش محتاجه حاجه دى فلوس كتيره قوى هاعمل بيهم ايه انا مش محتاجه ده كله خد فلوسك انا بجد مش محتاجاها وبتبكى جامد وشها غرق دموع وتمسح دموعها بشالها الاسود ..
بعد كده لاقيتها عطتنى التليفون وقالتلى خد عاوز يكلمك اتعرف عليا وبالصدفه لاقيته يعرف أخويا..
المهم قالى خلى باللك من الست نعمه انا قصدت اشيل عندها امانه عشان اثبت لحد معين انها فعلا امينه وعينيها مليانه ومحتاجه بجد المساعده..
من فضلك محتاج منك خدمه خلى باللك منها ووصلها لغاية بيتها وقولها انى هازورها بكره ..
حقيقى انا عمرى ماشوفت كدا فى حياتى ..
طول السكه وانا معاها مش مبطله كلام عن ربنا وحنية ربنا وازاى بيسمعنا وازاى بيحافظ علينا وبيحبنا وبيحمينا قالتلى كلمه حلوه قوى اول ما وصلتها البيت مستحيل اقدر انسى الكلمه دى قالتلى ربنا بيحس بيك من قبل ما حتى تنطق بالۏجع