أخو جوزي فتح دولابي في غيابي 1 2 3 بقلـم حكايات زهـره الربيـع
رجعت من عند اهلي لقيت اخو جوزي اللي عنده ١٩ سنه فاتح دولابي ومطلع قطعه من هدومي الخاصه واول ما شافني اتخض ووقعت منه ، وبعد ما صوت وعملت مشكله متتحلش اضطر يقول على المصيبه اللي جيه يعملها ساعتها طلبت الطلاق فورا ؟؟؟
انا عايشة في دور تاني في بيت عيلة جوزي، والحياة مكانتش سهله ابدا زي ما اتوقعت. مشكلتي شالوحيدة مع أهله كانت عدم الخصوصية.
أم جوزي وأخوه الصغير علاء، اللي عنده 19 سنة، كانو طول الوقت طالعين نازلين عندي. يقعدوا بالساعات في الشقة، وأوقات كتير يناموا في الصالة بحجة إن التكييف عندي شغّال وهما شقتهم حر ومفيهاش تكييف.
كنت بتخنق جدا، الصالة قصاد باب الحمام بالظبط، وكنت بتكسف أتحرك في بيتي أو أدخل الحمام قدامهم.
جوزي كان طيب جداً معايا في كل حاجة، بس غلبان ومبيقدرش يكسر كلمة لأمه أو يقولها تنزل. كل ما أشتكيلو ويشوفني متضايقة، يطبطب عليا ويقولي معلش يا نورا استحملي، أول ما أقبض الجمعية هجيبولهم تكييف تحت ونحل الأزمة دي خالص. كنت بأطفي ناري وأسكت عشان خاطره، رغم إن حماتي كانت بتسممني بالكلام وبتعاملني بقسو، وكل ما تشوفني متضايقة تقول بصوت عالي دي شقة ابني وأنا أدخلها وقت ما أنا عاوزة! هي اصلاً مكانتش حاباني
رغم كل الخنقة دي، كنت بعدي وأقول عشان خاطره وعشان المركب تسير. لحد اليوم الشوم ده.
استأذنت جوزي وروحت أزور أمي الصبح. سبته في الشقة وقبل ما أمشي أكدت عليه لما تنزل لشغلك أوعى تنسى تقفل باب الشقة بالمفتاح. كنت متعودة أقعد عند أمي للضهر، بس بعد ما وصلت بساعة واحدة، لقيت أمي وراها مشوار مهم ونازلة، فقلت أرجع بيتي ومأعطلهاش.
وصلت البيت، ولقيت حماتي قاعدة تحت في أوضتها، مرضيتش أنادي عليها ولا أعمل صوت عشان مكنتش قادرة على كلامها. طلعت على شقتي بالراحة، وأول ما وصلت لقيت الباب موارب! استغربت جداً وقلت يمكن جوزي منزلش الشغل أو نسي حاجة ورجع.
دخلت الشقة والهدوء كان غريب. مشيت للداخل ولقيت باب اوضة النوم مفتوح.. خطوت خطوتين ولما بصيت جوة، كنت هقع من طولي من المنظر.
لقيت علاء، أخو جوزي اللي عنده 19 سنه، واقف قدام دولابي المفتوح، ومطلع قطعة من هدومي الخاصة في إيده وبيفتش في بقية الهدوم!
أول ما شافني، وشه اتخطف واتصدم صدمة عمره، الهدوم وقعت من إيده على الأرض ووشه اصفر وزي ما يكون الدم اتصفى منه.
الولد اترعب وبدأ يترعش، وقال... مبعملش حاجه والله انا ....انا
بس انا صرخت فيه...... انت ليلتك سوده يا سافل ايه اللي بتعمله ده
الولد خاف جدا ومن خضته نطق وقال كلام مكانش يتخيله عقل.. كلام نزل عليا زي الميه اللي بتغلي، خلاني أفقد توازني وأسند على الباب وأنا مش مصدقة اللي بسمعه.
وقتها قطع أخر خيط كان بيني وبين البيت ده مستنيتش دقيقة واحدة، مسكت تليفوني وإيدي بتترعش من الصدمة، اتصلت بجوزي وقلتله بصوت قاطع مفيش فيه رجعة تيجي حالا تطلقني.. أنا عايزه اتطلق حالا
زهرة_الربيع
صلي على رسول الله
الولد كان بيترعش زي الورقة في مهب الريح، شفايفه كانت بتترجف وعينيه رايحة جاية في الأوضة برعب كأنه مستني الأرض تنشق وتبلعه، ولما صرخت فيه تاني وهجمت عليه عاوزة أضربه، رمى الهدوم من إيده ورفع إيديه الاتنين يداري وشه وصرخ بعلو صوته وهو بيعيط
والله العظيم مش بمزاجي يا نورا! والله أمي هي اللي قالتلي.. هي اللي خلتني أعمل كده!
وقفت مكاني متيبسة، الكلمة نزلت على وداني خلت الدنيا تدور بيا.. همست بصدمة ولساني بيتقل
أمك؟!.
الولد قعد على ركبه في الأرض منهار، وقال وصوته بيتقطع من البكاء
قالتلي.. قالتلي اطلعي هاتلي أي حتة من هدومها الخاصة.. حتة تكون لامسة جسمها.. عشان.. عشان نوديها لواحدة شيخة في البلد تعملها عمل يخلي أخويا يكرها ويكره ريحتها ويطلقها بالثلاثة.. عشان يرجع يتجوز بنت خالتي اللي أمي حطاها في دماغها!
في اللحظة دي، حسيت كأن جردل مية بتغلي ادلق على دماغي، ودماغي صفرت من هول اللي سمعته. سحر؟ أعمال؟ تخريب بيوت بالنجاسة دي ومن مين؟ من حماتي اللي قاعدة تاكل وتشرب في بيتي وابنها مبيكسرلهاش كلمة؟! وبتستخدم مين؟ عيل عنده 19 سنة، طالع ينتهك حرمة بيتي ودولابي عشان يرضي أمه المجرمة؟!
رجعت لورا خطوتين وأنا بسند على الحيطة، مش حاسة برجليا من كتر الرعشة. الغضب اتملك مني بطريقة عمري ما جربتها في حياتي، مسكت التليفون وكلمت جوزي.. صرخت فيه بكل قهر السنين اللي استحملتها
تيجي حالا تطلقني.. أنا عايزة اتطلق حالا يا طارق! طارق اتخض من صوتي وقال بفزع
في إيه يا نورا؟! مالك بتصرخي كده ليه؟ أهدي وفهميني أنتي فين وجرى إيه؟
تعال على الشقة حالا
